جہاں پیڑ پر چار دانے لگے

وہیں ہر طرف سے نشانے لگے

سویرے کی پہلی کرن دیکھ کر

چراغوں کو ہم خود بجھانے لگے

ہوئی شام یادوں کے اک گاؤں سے

پرندے اُداسی کے آنے لگے

وہیں زرد پتّوں کے اب ڈھیر ہیں

گلوں کے جہاں شامیانے لگے

گھڑی دو گھڑی مجھ کو پلکوں پہ رکھ

یہاں آتے آتے زمانے لگے

ہوا کے حوالے کرو اب مجھے

کہیں یہ تو مٹّی ٹھکانے لگے

مجھے اُس بصارت سے محروم رکھ

جو آنکھوں کی شمعیں بجھانے لگے

کبھی بستیاں دل کی یوں بھی بَسیں

دکانیں کھلیں کارخانے لگے

پڑھائی لکھائی کا موسم کہاں

کتابوں میں خط آنے جانے لگے