حمدنعتغزلنظمقطعاتترانےمناجاتبزم مزاحگیت
فہرست ردیف
منتخب کلام کی ردیف کے آخری حرف کی ترتیب پر فہرست

تو کجا من کجا ، تو کجا من کجا

نعت| مظفرؔ وارثی انتخاب| حنظلہ سید

تو کجا من کجا ، تو کجا من کجا
تو کجا من کجا ، تو کجا من کجا
تُو امیرِ حرم ، میں فقیرِ عجم
تیرے گن اور یہ لب؟ میں طلب ہی طلب
تُو عطا ہی عطا ، تو کجا من کجا
تو کجا من کجا ، تو کجا من کجا
تُو ابد آفریں میں ، ہوں دو چار پل
تُو یقیں ، میں گماں ، میں سخن ، تُو عمل
تُو ہے معصومیت ، میں نِری معصیت
تُو کرم میں خطا ، تو کجا من کجا
تو کجا من کجا ، تو کجا من کجا
تُو ہے احرامِ انوار باندھے ہوئے
میں درودوں کی دستار باندھے ہوئے
کعبۂ عشق تُو ، میں ترے چار سو
تُو اثر ، میں دعا ، تو کجا من کجا
تو کجا من کجا ، تو کجا من کجا
تُو حقیقت ہے ، میں صرف احساس ہوں
تُو سمندر ، میں بھٹکی ہوئی پیاس ہوں
میرا گھر خاک پر ، اور تری رہ گزر
سدرۃ المنتہیٰ ، تو کجا من کجا
تو کجا من کجا ، تو کجا من کجا
میرا ہر سانس تو خوں نچوڑے مرا
تیری رحمت مگر دل نہ توڑے مرا
کاسۂ ذات ہوں ، تیری خیرات ہوں
تُو سخی ، میں گدا ، تو کجا من کجا
تو کجا من کجا ، تو کجا من کجا
ڈگمگاؤں جو حالات کے سامنے
آئے تیرا تصور مجھے تھامنے
میری خوش قسمتی ، میں ترا اُمتی
تُو جزا ، میں رضا ، تو کجا من کجا
تو کجا من کجا ، تو کجا من کجا
میرا ملبوس ہے پردہ پوشی تری
مجھ کو تابِ سخن دے خموشی تری
تُو جلی ، میں خفی ، تُو اٹل ، میں نفی
تُو صلہ ، میں گلہ ، تو کجا من کجا
تو کجا من کجا ، تو کجا من کجا
دوریاں سامنے سے جو ہٹنے لگیں
جالیوں سے نگاہیں لپٹنے لگیں
آنسوؤں کی زباں ، ہو میری ترجماں
دل سے نکلے سدا ، تو کجا من کجا​
تو کجا من کجا ، تو کجا من کجا
تو کجا من کجا ، تو کجا من کجا

پچھلا کلام | اگلا کلام

شاعر کا مزید کلام