کیا تجھ کو خبر ہے ہم کیا کیا ائے شورشِ دوراں بھول گئے

وہ زلفِ پریشاں بھول گئے وہ دیدۂ گریاں بھول گئے

ائے شوقِ نظارہ کیا کہیے نظروں میں کوئی صورت ہی نہیں

ائے ذوقِ تصور کیا کیجئے ہم صورتِ جاناں بھول گئے

اب گل سے نظر ملتی ہی نہیں اب دل کی کلی کِھلتی ہی نہیں

ائے فصلِ بہاراں رخصت ہو ہم لطفِ بہاراں بھول گئے

سب کا تو مداوا کر ڈالا اپنا ہی مداوا کر نہ سکے

سب کے تو گریباں سی ڈالے اپنا ہی گریباں بھول گئے

یہ اپنی وفا کا عالم ہے اب اُن کی جفا کو کیا کہیئے

اک نشترِ زہر آگیں رکھ کر نزدیک رگِ جاں بھول گئے