معجزہ ہو گیا میرے گھر آ گئے

نور کے قافلے سر بسر آ گئے

جام خالی نہ کوئی نظر آئے گا

مہربانی پہ محبوب گر آ گئے

ہم نے سوچا تھا بچ کر نکل جائیں گے

اُن کی نظروں کے زیرِ اثر آ گئے

اُس نے بے چین ہو کر جو آواز دی

بوکھلاہٹ میں ہم بام پر آ گئے

کوئی منزِل تعیّن میں اپنے نہ تھی

یونہی چلتے ہوئے ہم کدھر آ گئے

جگنوؤں سے تعلق تو پہلے بھی تھا

تیری محفِل سے بھی چشمِ تر آ گئے

ایک مدّت تلک راہ تکتے رہے

مر گئے باپ ماں تو پِسر آ گئے

ہم نے سمجھا تھا خود کو انا کا اسیر

ہو گیا حال اپنا دِگر آ گئے

دام رکھے تھے حسرتؔ وفا نام کے

پِھر تو سب طالبِ مال و زر آ گئے