وہ اہتمامِ جشنِ بہاراں نہ کر سکے

خونِ جگر جو صرفِ گلستاں نہ کر سکے

سارا ملال وقفِ نشاطِ نظر ہوا

اُن سے ملے تو شکوۂ ہجراں نہ کر سکے

تیری خلش نے زیست کا ہر غم بھلا دیا

ان حسرتوں پہ پھر کوئی ارماں نہ کر سکے

محرومیوں پہ اُن کی ہے ساحل کی آنکھ نم

جو خود کو غرقِ عشرتِ طوفاں نہ کر سکے

کس درجہ حسن کا ہمیں پردہ عزیز تھا

دنیا میں کوئی کارِ نمایاں نہ کر سکے

جن کی نگاہِ لطف بھی آبِ حیات ہے

وہ بھی علاجِ تلخیٔ درواں نہ کر سکے

دیر و حرم میں لاکھ بھٹکتے پھرے سرورؔ

لیکن خلافِ شیوۂ رنداں نہ کر سکے