تجھے ائے دشمنِ ایماں کہیں کیا کس قدر چاہا

کہ پتھر جان کر پوجا ستم گر مان کر چاہا

نہ پوچھو جرعۂ آبِ بقا کی تلخیاں ہم سے

کہ جھیلی جانکنی پیہم جو جینا لمحہ بھر چاہا

خرد کی نوکِ ناخن بھی شریکِ نشترِ غم ہے

ہر اک آزارِ ہستی نے مرے ہی دل میں گھر چاہا

دل ایسا دشمنِ آسودگی نکلا کہ کیا کہیے

نگاہوں نے بہت دنیا سے رکھنا بے خبر چاہا

ترے اس کشتۂ تیغِ ادا کو مرحبا جس نے

نہ جلنا آگ میں سیکھا نہ کھنچنا دار پر چاہا

بھلا اُس جانِ جاں کو کس جگر سے بے وفا کہیے

کہ جس نے ناز بھی کرنا ہمیں سے خاص کر چاہا

وہ کیا غم تھا خدایا جس کے خاطر ہم نے دل پایا

وہ سودا کون سا تھا جس کے خاطر ہم نے سر چاہا

رہائی دردِ ہستی سے کہاں گو دردِ سر کہیے

گیا سر ہی سے وہ جس نے علاجِ دردِ سر چاہا

ہنر کیا عیب کیا حقیؔ زہے وہ قدر داں میرے

جنھوں نے عمر بھر مجھ کو سمجھ کر بے ہنر چاہا