جب ذرا زخمِ دلِ بیمار بھرنے آئے ہے

یادِ ایامِ محبت پھر ہوا دے جائے ہے

اتفاقاً جب اسے میرا خیال آ جائے ہے

روئے ہے گھبرائے ہے بل کھائے ہے شرمائے ہے

لب تک آتے آتے رہ جائے ہے ذکرِ حالِ دل

اُٹھتے اٹھتے وہ نگاہِ شرمگیں بھر جائے ہے

رخصت ائے شامِ جدائی الوداع ائے یادِ دوست

سونے والے جاگتے ہیں اب مجھے نیند آئے ہے

ختم کر رودادِ غم عرضِ وفا احوالِ شوق

آنکھ اُٹھا کر دیکھ جسمِ یار بھیگا جائے ہے

اپنی بربادی پہ ان کو خندہ لب پا کر ظفرؔ

احتراماً میرے لب پر بھی ہنسی آ جائے ہے