ہر کوششِ پیہم خام ہوئی ہر سعیٔ طلب ناکام رہی

ہم پر وہ ستم بھی کر نہ سکے غیروں پہ وفا بھی عام رہی

جلوہ تو پسِ پردہ ہی رہا نظروں کو نظارہ مل نہ سکا

کچھ اُن کی ادائیں ناقص تھیں کچھ میری طلب ناکام رہی

خوشیوں کی ہزاروں راہیں تھیں عشرت کے کئی کاشانے تھے

ہر راہ میں لیکن قسمت سے دیوارِ غم و آلام رہی

اک شعلہ نگاہِ ساقی کا ائے شیخ تجھے بھی پھونک گیا

تقویٰ بھی ترا کام آ نہ سکا توبہ بھی تری ناکام گئی

تہذیب و تمدن کے قاتل پاتے ہی رہے اعلیٰ منصب

مفلس کی ادا بے بس کی وفا آوارہ ہوئی بدنام رہی

اس دل کی لگی کو کیا کہیئے جس نے یہ ظفرؔ کا حال کیا

اک حرفِ غلط آغاز ہوا اک لغزشِ پا انجام رہی