بادِ صبا لائی تھی خوشبو ابرِ خراماں آیا تھا

یاد نہیں کب دل کے چمن میں دورِ بہاراں آیا تھا

دیوانے اِس شان گذرے جبر و سزا کی منزل سے

ایک زمانہ حیراں حیراں تا درِ زنداں آیا تھا

دشت و بیاباں چھانے ہم نے زنداں دیکھے مقتل بھی

کیا جانے کب کس رستے میں شہرِ نگاراں آیا تھا

خوب گلے مل مل کے روئے خوب کُریدے دل کے گھاؤ

رات بہت دن بعد خیالِ گیسوئے جاناں آیا تھا

بربادی کے بعد ہمارے رونے والے لاکھوں تھے

پہلی ڈوبی دل کی کشتی بعد میں طوفاں آیا تھا

بھول نہ جانا قیصؔر کو ائے نغمہ گرانِ صبحِ بہار!

وہ بھی تمہاری بزم میں لے کر سازِ دل و جاں آیا تھا