حمدنعتغزلنظمقطعاتترانےمناجاتبزم مزاحگیتادب اطفالرباعیآزاد نظم
فہرست ردیف
منتخب کلام کی ردیف کے آخری حرف کی ترتیب پر فہرست

یہ عشق نے دیکھا ہے یہ عقل سے پنہاں ہے

غزل| اصغرؔ گونڈوی انتخاب| بزم سخن

یہ عشق نے دیکھا ہے یہ عقل سے پنہاں ہے
قطرہ میں سمندر ہے ذرّہ میں بیاباں ہے
ہے عشق کہ محشر میں یوں مست و خراماں ہے
دوزخ بہ گریباں ہے فردوس بہ داماں ہے
ہے عشق کی شورش سے رعنائی و زیبائی
جو خون اچھلتا ہے وہ رنگِ گلستاں ہے
پھر گرمِ نوازش ہے ضو مہرِ درخشاں کی
پھر قطرہٴ شبنم میں ہنگامہٴ طوفاں ہے
ائے پیکرِ محبوبی میں کس سے تجھے دیکھوں
جس نے تجھے دیکھا ہے وہ دیدہٴ حیراں ہے
سو بار ترا دامن ہاتھوں میں مرے آیا
جب آنکھ کھلی دیکھا اپنا ہی گریباں ہے
اک شورشِ بے حاصل اک آتشِ بے پروا
آفت کدہٴ دل میں اب کفر نہ ایماں ہے
دھوکا ہے یہ نظروں کا بازیچہ ہے لذّت کا
جو کنجِ قفس میں تھا وہ اصلِ گلستاں ہے
اک غنچہٴ افسردہ یہ دل کی حقیقت تھی
یہ موج زنی خوں کی رنگینیٔ پیکاں ہے
یہ حسن کی موجیں ہیں یا جوشِ تبسّم ہے
اس شوخ کے ہونٹوں پر اک برق سی لرزاں ہے

اصغرؔ سے ملے لیکن اصغرؔ کو نہیں دیکھا
اشعار میں سنتے ہیں کچھ کچھ وہ نمایاں ہے

پچھلا کلام | اگلا کلام

شاعر کا مزید کلام