حمدنعتغزلنظمقطعاتترانےمناجاتبزم مزاحگیتادب اطفالرباعیآزاد نظم
فہرست ردیف
منتخب کلام کی ردیف کے آخری حرف کی ترتیب پر فہرست

حسن بن کر خود کو عالم آشکارا کیجئے

غزل| اصغرؔ گونڈوی انتخاب| بزم سخن

حسن بن کر خود کو عالم آشکارا کیجئے
پھر مجھے پردہ بنا کر مجھ سے پردہ کیجئے
اضطرابِ غم سے ہے نشو و نمائے زندگی
ہر نفس میں ایک تازہ درد پیدا کیجئے
کھل گیا رنگِ حسیناں کھل گیا رنگِ چمن
کم سے کم اتنا نظر میں حسن پیدا کیجئے
عقل ہو غرقِ تجلی روح پا جائے جلا
بیٹھ کر اِک لحظہ شغلِ جام و مینا کیجئے
اک دلِ بیتاب میں پہلو میں پھر پیدا کروں
مسکرا کر پھر ذرا مجھ سے تقاضا کیجئے
پرورش پاتا ہے رگ رگ میں مزاجِ عاشقی
جلوہ پھر دکھلایئے پھر مجھ سے پردہ کیجئے
اس جہانِ غیر میں آرام کیا راحت کہاں
لطف جب ہے اپنی دنیا آپ پیدا کیجئے
دیر سے بھولے ہوئے ہیں درسِ مستی اہلِ بزم
آج ہر موجِ نفس کو موجِ صہبا کیجئے
رند ادھر بیخود اُدھر دیر و حرم گرمِ طواف
عرش بھی اب جھوم کر آتا ہے دیکھا کیجئے
دیکھتا ہوں میں کہ انساں کش ہے دریائے وجود
خود حباب و موج بن کر اب تماشا کیجئے
حسن کی بیگانگی و بے نیازی سب بجا
اُس پہ چھپ کر پردۂ گل سے اشارا کیجئے

ایک ہی ساغر میں اصغر کھل گئی دل کی گرہ
رازِ ہستی بھی کھلا جاتا ہے دیکھا کیجئے

پچھلا کلام | اگلا کلام

شاعر کا مزید کلام