ہلکی سی توجہ دیتے ہیں مبہم سا اشارہ کرتے ہیں

جب دل کی خلش دب جاتی ہے شہ دے کے ابھارا کرتے ہیں

توہینِ محبت کرتا ہے جو وصل کی حسرت کرتا ہے

عرفانِ محبت ہے جن کو فرقت ہی گوارا کرتے ہیں

ائے گردشِ دوراں یوں بھی کہیں آتا ہے تغیر دنیا میں

کونین میں چھا جانے والے گوشوں میں گذارا کرتے ہیں

ائے راحتِ ساحل کے بندو ہم عزم و عمل کے قائل ہیں

خود ڈوب کے طوفاں میں اکثر اوروں کو ابھارا کرتے ہیں

کیا آبلہ پائی کا کھٹکا کیا راہ زنی کا اندیشہ

منزل کی طرف بڑھنے والے ہر جبر گوارا کرتے ہیں

ہو عقل تو دل کے زخموں سے انساں کو سبق یہ ملتا ہے

جب دورِ الم پرور آئے ہنس ہنس کے گزارا کرتے ہیں

افسانہ جنابِ عنواںؔ کا اتنا تو کوئی ان سے کہہ دے

فرقت کی الم پرور راتیں رو رو کے گزارا کرتے ہیں