کیا جانے ذوق و شوق کے بازار کیا ہوئے

یوسف پکارتا ہے خریدار کیا ہوئے

گستاخیٔ نگاہِ تمنا کدھر گئی

تغریرِ درد کے وہ سزا وار کیا ہوئے

صبر آزما وہ شوقِ تماشا کہاں گیا

آسودگانِ سایۂ دیوار کیا ہوئے

ڈھونڈو تو کچھ ستارے ابھی ہوں گے عرش پر

دیکھو تو وہ حریفِ شبِ تار کیا ہوئے

دھوکہ نہ تھا نظر کا تو پھر ائے شبِ دراز

وہ ہلکے ہلکے صبح کے آثار کیا ہوئے

جذبیؔ کہاں گئیں وہ تری دل فروزیاں

ڈوبے ہوئے وہ سوز کے اشعار کیا ہوئے