کتنی بلندیوں پہ سرِ دار آئے ہیں

کسی معرکہ میں اہلِ جنوں ہار آئے ہیں

گھبرا اٹھے ہیں ظلمتِ شب سے تو بارہا

نالے ہمارے لب پہ شرر بار آئے ہیں

اے قصہ گو ازل سے جو بیتی ہے وہ سنا

کچھ لوگ تیرے فن کے پرستار آئے ہیں

پائی گلوں سے آبلہ پائی کہ جب نہ داد

دیوانے ہیں کہ سوۓ لبِ خار آئے ہیں

غم خواریوں کی تہہ میں دبی سی مسرتیں

یوں میرے پاس بھی مرے غم خوار آئے ہیں

پہنچے ہیں جب بھی خلوتِ دل میں تو اے ندیم

اکثر ہم اپنے آپ سے بیزار آئے ہیں

اُس بزم میں تو مے کا کہیں ذکر تک نہ تھا

اور ہم وہاں سے بے خود و سرشار آئے ہیں

اُس کی گلی میں ہم نے لٹا دی متاعِ جاں

اس کی گلی سے ہم تو سبک سار آئے ہیں

کرتے رہے ہیں فن کی پرستش تمام عمر

محشر میں کیسے کیسے گنہ گار آئے ہیں

جذبیؔ جو ہو سکے تو مری حیرتوں سے پوچھ

کس طرح میرے ذہن میں اشعار آئے ہیں