خزاں کے بعد مری جاں بہار بھی آئی

مگر نبیلؔ کی وحشت میں کیا کمی آئی

یہ کس کے در پہ ستاروں کا کارواں اترا

ہوا کے دوش پہ خوشبو کی پالکی آئی

یہ کس کا خواب مری خواب گاہ میں آیا

یہ کس کی نیند مری آنکھ میں چلی آئی

وہ اپنی جیت کے قصے سنا کے رونے لگا

نہ جانے کیوں مری آنکھوں میں بھی نمی آئی

کل اپنے آپ سے باتیں ہوئیں تو ایسا ہوا

مجھے خود اپنے خیالات پہ ہنسی آئی

سنا گیا تھا کہ صحرا کو جا چکا ہے نبیلؔ

سنا گیا ہے کہ صحرا میں زندگی آئی