جس طرف دیکھو ہزاروں سلسلے بے تاب ہیں

اک ہماری جستجو ہے اور ہم نایاب ہیں

روح کے اندھے کنویں میں جھانک کر پاؤگے کیا

چند زخمی خواہشیں ہیں کچھ پرانے خواب ہیں

ہوش والوں سے کوئی کہہ دے کہ اپنے گھر کو جائیں

دشت میں آوارگی کرنے کے بھی آداب ہیں

بادلو! جا کر بجھاؤ پیاسے دریاؤں کی پیاس

ہم وہ صحرا ہیں جو اپنے آپ میں سیراب ہیں

صرف تم ہی تو نہیں تھے میرے جینے کا سبب

زندہ رہنے کے مری جاں اور بھی اسباب ہیں

آنکھ سے دریا بہانے کا نتیجہ بھی تو دیکھ

خواب کے سارے علاقے آج زیرِ آب ہیں

ورنہ جس کو دیکھئے وہ دست بستہ ہے نبیلؔ

ہم ہی شاید شہر میں ناواقفِ آداب ہیں