زندگی زندگی پر خطر زندگی

ایک کانٹوں بھری رہ گزر زندگی

ساتھ چھوڑے کہاں کیا خبر زندگی

بے وفا ہائے نا معبتر زندگی

مانگتی ہے فقط سیم و زر زندگی

کیا رہے ایک مفلس کے گھر زندگی

ایک آتی ہوئی ایک جاتی ہوئی

دو ہی سانسوں پہ ہے منحصر زندگی

آرزوئیں جواں خواہشیں بیکراں

کام بے انتہا مختصر زندگی

کیسی عیاش ہے کتنی مغرور ہے

اپنے انجام سے بے خبر زندگی

کوئی رہبر نہ منزل نہ سمتِ سفر

جا رہی ہے نہ جانے کدھر زندگی

تو نے سمجھا ہے نادان منزل اسے

چند روزہ ہے بس اک سفر زندگی

رنج ناکامیاں کرب محرومیاں

خونِ دل اشک داغِ جگر زندگی

دل کی آسودگی روح کی تازگی

پھول شبنم نسیمِ سحر زندگی

وقتِ رخصت یہ شاہینؔ کہتا چلا

الوداع الوداع ہم سفر زندگی