سکوں نہیں نہ سہی دردِ انتظار تو ہے

ہزار شکر کوئی دل کا غم گسار تو ہے

نگاہِ یاس نہ شرمندۂ جفا کو چھیڑ

یہی بہت ہے کہ وہ آج شرمسار تو ہے

ثبوت دردِ محبّت کا اور کیا ہوگا

مری نظر سے ترا حسن آشکار تو ہے

نگاہِ یاس کو آزادیاں نہیں نہ سہی

شکایتِ غمِ ہجراں کا اختیار تو ہے

تمہارے جلوؤں کی رنگینیوں کا کیا کہنا

ہمارے اجڑے ہوئے دل میں اک بہار تو ہے

بدل نہ جائے کہیں رنگِ منظرِ فطرت

تری تلاش میں ہر نالہ بے قرار تو ہے