سوزِ غم دے گیا کون سا رشکِ گل یہ ہوا عشق کے کس چمن میں لگی

آنچ دل سے اٹھی لَو جگر تک گئی منہ سے نکلا دھواں آگ تن میں لگی

تا بہ عہدِ جنوں دھوم نالوں کی تھی بیخودی جاتے ہی شرم آنے لگی

لو وہ دل کی گرہ خود بخود کھل گئی لو وہ مہرِ خموشی دہن کو لگی

یہ اچانک نظر کس طرف جا پڑی سادگی کی ادا آنکھ میں کُھپ گئی

اُف کنکھیوں سے تکنا ستم ہو گیا دل پہ برچھی اسی بانکپن میں لگی

پھر بہار آگئی گھر میں الجھن ہوئی پھر بڑھی بیخودی دھن لگی دشت کی

اُف یہ جوشِ جنوں اُف یہ گرمیٔ خوں پھول کھلنے لگے آگ بن میں لگی

آرزوؔ آرزوؔ کیا ہوا کیا ہوا چپ ہو کیوں چپ ہو کیوں کچھ کہو کچھ کہو

فق ہے منہ زرد رُخ چشم تر خشک لب چوٹ دل کو یہ کس انجمن میں لگی