حساب کرنے کی کوششوں میں ہم اس کی باتوں میں آ گئے ہیں

نئے طلب کردہ سب خسارے پرانے کھاتوں میں آ گئے ہیں

شکستگی کے عمل سے واقف نہیں ہیں پہلے بھی اگلی نسلیں

اور اب تو مٹی سے بننے والے کھلونے دھاتوں میں آ گئے ہیں

گریز کرتی ہوئی یہ ٹہنی ابھی جو خود میں سمٹ رہی تھی

ذرا سی کھینچی ہے اپنی جانب تو پھول ہاتھوں میں آ گئے ہیں

اے شب گزیدو! ہماری نیندیں حرام ہونا الگ ستم ہے

اداس شاموں کے سلسلے بھی ہماری راتوں میں آ گئے ہیں

بچی نہیں ہے کسی بھی پیشے میں وضعداری کی پاسداری

بڑے بڑے نام چھوٹی چھوٹی سی وارداتوں میں آ گئے ہیں

ہم ابر پارے دھنک کی زد میں کچھ ایسے آئے کہ ہائے ہائے

ہوئے ہیں دو چار اک دو رنگوں سے اور ساتوں میں آ گئے ہیں

سخن سخن میں یہ کس کے ہونٹوں کا زنگ زائل ہوا ہے اظہرؔ

ورق بیاضوں کے کھل گئے ہیں قلم دواتوں میں آ گئے ہیں