سیّد الاوّلیں ، سیّد الآخریں

تجھ سا کوئی نہیں سیّد المرسلیں

خاتمِ حسن کے خوب صورت نگیں

اے حسینانِ عالم سے بڑھ کر حسیں

تجھ کو سوچوں تو احساس ہو ریشمیں

تجھ کو لکھوں تو ہر لفظ ہو عنبریں

اے سراجِ ہدیٰ! میرے دل کی ضیا

تجھ سے پر نور ہو میری دنیا و دیں

تیرگی میں حقیقت کا ادراک تو

میں ہوں حرفِ گماں تو کتابِ یقیں

کیسے سمٹیں گی یہ ہجر کی دوریاں؟

تو ہے بامِ فلک میں ہوں فرشِ زمیں

قبلۂ روئے من ، کعبۂ روحِ من

خم ترے در پہ سمعاںؔ کے دل کی جبیں