سر میں سمائے عشق کا سودا مرے رسولؐ

روحِ حیات جانِ تمنا مرے رسولؐ

گلزارِ کائنات کی رونق ہے آپؐ سے

زیبِ وجود حسنِ سراپا مرے رسولؐ

ذوقِ جمال مجھ کو ٹھہرنے نہ دے کہیں

اوجِ کمال آپؐ کا اسوہ مرے رسولؐ

روکیں نہ میری راہ زمانے کی گردشیں

ہیں رہ نوردِ جادۂ سدرہ مرے رسولؐ

سرمایۂ حیات محبت ہے آپؐ کی

میری نگاہِ شوق کا کعبہ مرے رسولؐ

بے تابیٔ نگاہ کی تسکین آپؐ ہیں

فردوسِ چشم آپؐ کا چہرا مرے رسولؐ

دستِ کرم سے دیجیے بیمارِ عشق کو

ساغر سبو صراحی و صہبا مرے رسولؐ

شیرینیٔ سخنؔ سے ہے زخموں کا اندمال

دردِ جگر کا آپؐ مداوا مرے رسولؐ