حمدنعتغزلنظمقطعاتترانےمناجاتبزم مزاحگیتادب اطفالرباعیآزاد نظم
فہرست ردیف
منتخب کلام کی ردیف کے آخری حرف کی ترتیب پر فہرست

بلائے ناگہانی بھی پیامِ زندگانی بھی

غزل| فراؔق گورکھپوری انتخاب| بزم سخن

بلائے ناگہانی بھی پیامِ زندگانی بھی
قیامت ہے قیامت یہ تری اٹھتی جوانی بھی
مٹا کر ہم کو مٹ جاتا ہے غم بھی شادمانی بھی
ازل ہی سے ہے یہ دنیا حقیقت بھی کہانی بھی
پہاڑوں کی ہے سختی تو گذر اس میں ہے دریا کا
ملا وہ دل محبت کو جو پتھر بھی ہے پانی بھی
نہ پائی راہ دل میں گو غمِ دنیا نے بھی لیکن
کہاں ہے آج ایسی تیرے غم کی پاسبانی بھی
غمِ دوراں کا رکھ کچھ دھیان اپنا غم سنانے میں
کہ اک دن ختم ہوجائے گی ناداں یہ کہانی بھی
خطِ تقدیر اپنا پڑھ چکا ہوں بارہا لیکن
نگاہِ یار آخر کوئی پیغامِ زبانی بھی
گلستاں در گرہ لب شبستاں درکنار آنکھیں
کہ ہے صبحِ بہاراں اس کا غم بھی شادمانی بھی
نگاہوں کا وہ عالم دیدنی ہے جب جھلکتی ہے
کسی کی نرگسِ معصوم میں کچھ بدگمانی بھی
ہمیں غش کھا گئے ہیں شعلۂ آواز پر اپنے
ہمیں نے بارہا دی ہے صدائے لن ترانی بھی
عجب کیا اہلِ عالم اب اگر ہم درد بن جائیں
کہ کچھ کم ہو چلا ہے سوزِ غم ہائے نہانی بھی
نگاہِ ناز کے اٹھتے ہی ائے رنگِ رخِ جاناں
چھلکنا سیکھ لے تجھ سے شرابِ ارغوانی بھی
فراقؔ اس دور کو دورِ عمل کہتے تو ہیں لیکن
رہے گی یاد دنیا کو تری جادو بیانی بھی

پچھلا کلام | اگلا کلام

شاعر کا مزید کلام