کہا کہ آپ کو یوں ہی گمان ایسا ہے

وہ بولے جی نہیں سچ مچ جہان ایسا ہے

کہا کہ آئیے بس جائیے مِرے دل میں

وہ بولے آپ کے دل کا مکان ایسا ہے؟

کہا کہ پھولوں میں کیا خوب دل ربائی ہے

وہ بولے کیوں نہ ہو جب باغبان ایسا ہے

کہا کہ آپ تو رونے لگے غزل سن کر

وہ بولے آپ کا طرزِ بیان ایسا ہے

کہا کہ آپ کے جیسا کوئی حسین نہیں

وہ بولے آپ کو یوں ہی گمان ایسا ہے

کہا کہ آپ کے آنچل سی کوئی چیز ہے کیا؟

وہ بولے تاروں بھرا آسمان ایسا ہے

کہا کہ آپ تو راغبؔ کو بھی بھلا بیٹھے

وہ بولے وقت ہی نا مہربان ایسا ہے