جب ادائے حسن میں ظالم ادائیں آ گئیں

اِس دلِ بے تاب کے سر پر بلائیں آ گئیں

دل جلاتی اور کرتی سائیں سائیں آ گئیں

پھر تمہاری یاد کی پاگل ہوائیں آ گئیں

دل ہی دل میں کوئی دل سے یاد کرتا ہے مجھے

دل سے دل تک دل دھڑکنے کی صدائیں آ گئیں

پھر خطا مجھ سے ہوئی پھر بھولنا چاہا تجھے

پھر تری یادیں مجھے دینے سزائیں آ گئیں

خوف و دہشت ہے عیاں ان کے ہر اِک انداز سے

زد پہ کس شہباز کی یہ فاختائیں آ گئیں

کون ہے جو چاہتا ہے مجھ کو راغبؔ اِس قدر

ہر بلا کو ٹالنے کس کی دعائیں آ گئیں