مرے دل کا نگاہ سے خوں نہ بہا تجھے اپنے جلوہ گری کی قسم

تجھے نشۂ بے خبری کی قسم تجھے شوخیٔ جانِ بری کی قسم

تجھے عارضِ رشکِ قمر کی قسم تجھے شعلۂ داغِ جگر کی قسم

تجھے شوخیٔ برقِ نظر کی قسم تجھے گرمیٔ جلوہ گری کی قسم

تجھے دیدۂ شعلہ فشاں کی قسم تجھے خندۂ زخمِ نہاں کی قسم

تجھے لالۂ سوختہ جاں کی قسم تجھے داغ کی شعلہ وری کی قسم

تجھے کچھ بھی خیال ہے رشکِ قمر کہ ہوا ترے غم میں یہ خستہ جگر

کوئی دم مری خاک پہ آ کے ٹھہر تجھے شمعِ دمِ سحری کی قسم

مرے دیدۂ تر ہیں یہ شعلہ فشاں ترے عکسِ جمال کا ہے یہ نشاں

غمِ عشق سے دل میں ہے داغِ نہاں ترے چہرۂ رشکِ پری کی قسم

نہ کر اتنا ذکیؔ دلِ زار کو خوں کہ یہ ذوقِ سخن ہے مذاقِ زبوں

ترے طرز سے آئی ہے بوئے جنوں مجھے تیری بے جگری کی قسم