گل کاریٔ خونِ دل سے زمیں صحرا کی گلستاں کون کرے

ہے سرِّ عیاں رازِ رگِ جاں تشریحِ رگِ جاں کون کرے

اس دل کو کوئی کیا شاد کرے ہو جس میں ہزاروں ویرانے

ایک گھر ہو اُسے آباد کریں تعمیرِ بیاباں کون کرے

ہم دورِ خزاں میں بھول چکے آداب و رسومِ موسمِ گل

اب موسمِ گل کی آمد پر تعظیمِ بہاراں کون کرے

جب دل تھا اسیرِ شعلۂ غم تھی کوششِ آہ و نالہ بجا

اب کیا ہے غمِ پنہاں کے سوا عرضِ غمِ پنہاں کون کرے

اے دورِ طرب تکلیف نہ کر دن بیت گئے امیدوں کے

محفل میں چراغاں ہو نہ سکا مدفن پہ چراغاں کون کرے

محتاجِ وفا ہیں اہلِ جہاں پھر جنسِ وفا کیوں عام نہیں

ہر وقت ہے قدرِ جنسِ وفا اس جنس کو ارزاں کون کرے

آغازِ نمودِ غم سے حسنؔ آہوں کو ملی ہے وسعتِ دل

اس تنگ فضا کی دنیا میں آہوں کو پریشاں کون کرے