حمدنعتغزلنظمقطعاتترانےمناجاتبزم مزاحگیتادب اطفالرباعیآزاد نظم
فہرست ردیف
منتخب کلام کی ردیف کے آخری حرف کی ترتیب پر فہرست

محبت ایسی عبادت کسک پہ ختم ہوئی

غزل| شاہدؔ ذکی انتخاب| بزم سخن

محبت ایسی عبادت کسک پہ ختم ہوئی
شروع حق سے ہوئی اور شک پہ ختم ہوئی
میں اپنی روح کی تمثیل کی تلاش میں تھا
مری تلاش تمہاری مہک پہ ختم ہوئی
وہ خامشی جو کسی اور خامشی میں ڈھلی
کوئی سڑک تھی جو اگلی سڑک پہ ختم ہوئی
اک ابتلا تھی جسے لمس کی کشش کہئے
اک اشتہا تھی جو آب و نمک پہ ختم ہوئی
سیاہی چیخی ذرا دوسری طرف دیکھو
جب آئینے کی کہانی چمک پہ ختم ہوئی
کہا کہ آتشِ تخلیق مجھ پہ ظاہر ہو
گھٹا دھویں سے اٹھی اور دھنک پہ ختم ہوئی
مرا ہی عجز مرا آخری شکاری تھا
مری تنی ہوئی گردن لچک پہ ختم ہوئی
وہ رات جس میں سبھی صبحیں جڑ چکا تھا میں
تمہاری نیند کی پہلی جھپک پہ ختم ہوئی

حیات و موت کی تفصیل کیا کہوں شاہدؔ
زمیں سے بات چلی تھی فلک پہ ختم ہوئی

پچھلا کلام | اگلا کلام

شاعر کا مزید کلام