میرے جیسے اس بستی میں اور بھی پاگل رہتے ہیں

سب نے آنکھیں گروی رکھ کر آدھے خواب خریدے ہیں

کوئل ، کوا ، چیل ، کبوتر ، طوطا ، مینا ، چڑیا ، مور

شام ڈھلے سب چپ چپ بیٹھے اک دوجے کو تکتے ہیں

دریا ، ساگر ، امبر ، بادل ، بارش ، آندھی ، دھوپ ، ہوا

سب تیرا بہروپ ہے سائیں! تیرا نام ہی جپتے ہیں

خالی کرسی ، دو کپ چائے ، سبزہ ، خوشبو ، بوندا باندی

صبح سویرے مجھ سے مل کر تیر ی باتیں کرتے ہیں

ہجر ، اداسی ، وحشت ، آنسو ، آوارہ پن ، بیزاری

شوریدہ دل ، چاک گریباں سب الفت کے جھگڑے ہیں

ساغؔر ، میؔر ، فرؔاز اور غالؔب ، مومؔن ، داؔغ ، قتیؔل اور فیؔض

اوڑھ کے نظمیں غزلیں مصرعے چین سکون سے سوئے ہیں

باتیں، یادیں ، راتیں ، آنکھیں ، بانہیں ، آہیں ، فریادیں

سونے گھر کے اک کونے میں اکثر مل کر روتے ہیں

چاند ستارے ، جگنو ، سورج ، پریاں ، جن اور اڑتے پنچھی

سب دھرتی پر آ کر دانؔش اس کے پاؤں کو چھوتے ہیں