اجازت ہے؟ سجا لوں محفلِ یاراں! اجازت ہے؟

اجازت ہے؟ سجا لوں محفلِ یاراں ، اجازت ہے؟

مٹا لوں میں اگر ساقی غمِ جاناں ، اجازت ہے؟

حسیں زلفیں پریشاں ہیں ، اجازت ہو تو سلجھا دوں؟

وہ جھجکے مسکرائے ، پھر کہا ہاں ہاں! اجازت ہے!

چلو سب مے کشو! آؤ ! اسی کے شہر چلتے ہیں

وہاں اس کی حکومت ہے ، سنا ہے واں اجازت ہے!

فقط اک بار ہمت کی ، کہا! پہلو میں آبیٹھوں؟

وہ اترائے ، وہ شرمائے ، کہا! کیا یاں اجازت ہے؟

تمہیں اب سب اجازت ہے ، جو جی چاہے وہ کر لو تم

تمہیں آزاد کرتے ہیں دلِ ناداں اجازت ہے!

محبت میں مجھے سب کچھ نچھاور کر کے جانا ہے

میں حاضر ہوں ، مجھے کر دو تہی داماں ، اجازت ہے!

تری شوریدگی تجھ کو یہاں رہنے کہاں دے گی

چلا جا! ریگزاروں میں ، اٹھا ساماں ، اجازت ہے!

محبت ہے ، محبت ہے ، محبت ہے ، محبت ہے

کتابِ زندگی کو دوں میں یہ عنواں ، اجازت ہے؟

سنا ہے اب محبت نے تمہیں یکسر بدل ڈالا

جو جی چاہے وہ کرتے ہو ، تمہیں چنداں اجازت ہے!

عجب الجھن رہی دانؔش! اگرچہ ساتھ تھے دونوں

چلو اچھا! نہیں چھوڑو! ارے! ناں ناں ، اجازت ہے!