کانٹوں سے میں نے پیار کیا ہے کبھی کبھی

پھولوں کو شرم سار کیا ہے کبھی کبھی

یا شکوہ سنجِ جورِ خزاں ہی رہے ہیں ہم

یا ماتمِ بہار کیا ہے کبھی کبھی

اللہ رے بے خودی کہ ترے پاس بیٹھ کر

تیرا ہی انتظار کیا ہے کبھی کبھی

اتنا اثر تو ہے کہ مرے اضطراب نے

ان کو بھی بے قرار کیا ہے کبھی کبھی

اعجازِ شوق ہے کہ مرے ذوقِ دید نے

جلؤوں کو شرم سار کیا ہے کبھی کبھی

ائے شادؔ میں نے اپنے غمِ جاں گداز کو

شعروں میں آشکار کیا ہے کبھی کبھی