حمدنعتغزلنظمقطعاتترانےمناجاتبزم مزاحگیتادب اطفالرباعیآزاد نظم
فہرست ردیف
منتخب کلام کی ردیف کے آخری حرف کی ترتیب پر فہرست

غزل کے پردے میں بے پردہ خواہشیں لکھنا

غزل| فضاؔ ابن فیضی انتخاب| ابو الحسن علی

غزل کے پردے میں بے پردہ خواہشیں لکھنا
نہ آیا ہم کو برہنہ گزارشیں لکھنا
ترے جہاں میں ہوں بے سایہ ابر کی صورت
مرے نصیب میں بے ابر بارشیں لکھنا
حسابِ درد تو یوں سب مری نگاہ میں ہے
جو مجھ پہ ہو نہ سکیں وہ نوازشیں لکھنا
خراشیں چہرے کی سینے کے زخم سوکھ چلے
کہاں ہیں ناخنِ یاراں کی کاوشیں لکھنا
ہم ایک چاک ہیں جو کوزہ گر کے ہاتھ میں ہے
ہمارا کام زمانے کی گردشیں لکھنا
بہ راہِ راست کوئی فرض ادا نہیں ہوتا
وہی سفارشیں سننا سفارشیں لکھنا
ہوا نہ یہ بھی سلیقے سے زندگی کرتے
ہر ایک سانس کو ناکام کوششیں لکھنا
کہاں وہ لوگ جو تھے ہر طرف سے نستعلیق
پرانی بات ہوئی چست بندشیں لکھنا
ہنر ورو! ذرا کچھ دن یہ طرفگی بھی سہی
ہمارے لفظوں کو معنی کی لغزشیں لکھنا
کبھی جو خط اسے لکھنا فضاؔ تو رکھنا یاد
مری طرف سے بھی کچھ نیک خواہشیں لکھنا

پچھلا کلام | اگلا کلام

شاعر کا مزید کلام