یہ سیل بے رنگ آنسوؤں کا فضول ہے لاکھ بار آئے

02/ جنوری 1975ء کو بھٹکل کرناٹک کے مشاعرے میں پڑھی گئی غزل

بنے گا موتی وہ اشکِ رنگیں لہو سے جو ہم کنار آئے

چمن کے دیدہ وروں کو یارو ہنسی نہ کیوں بار بار آئے

میں فصلِ گل اس کو کہہ رہا ہوں خزاں کو بھی جس سے عار آئے

وفا تو کانٹوں کی سر زمین ہے یہاں وہی جاں نثار آئے

سکون میں جس کو بے کلی ہو تڑپ میں جس کو قرار آئے

چمن کے وہ خود پرست مالی جنھیں خزاں راس آ گئی ہے

وہ کس لئے آرزو کریں گے چمن میں فصلِ بہار آئے

درِ گلستاں پہ فصلِ گل کے حسین کتبے لگانے والو

ہمیں تو درکار ہے وہ موسم گلوں کو جو ساز گار آئے

متاعِ گلشن کچھ ایسے بانٹی مرے وفا دار دوستوں نے

نہ میرے دامن میں پھول پہنچے نہ ان کے دامن میں خار آئے

یہ کوئے جاناں ہے ہمصفیرو! عزیز ہو سر تو لوٹ جاؤ

ابھی تو آیا ہےصرف زنداں ابھی توقع ہے دار آئے

وفا کے ایوانِ مرمریں پر جلی قلم سے لکھا ہوا ہے

یہاں وہی سر فراز ہوگا جو سر کی بازی بھی ہار آئے

ہے رائگاں دوستو وہ ساعت رہے جو محرومِ جذب و مستی

وہ سانس قیمت میں کچھ نہیں ہے نہ جس سے پیغامِ یار آئے

خیالِ جاناں کی محویت میں کچھ ایسی چوٹیں بھی سہہ گیا ہوں

سنوں اگر اور کی زباں سے نہ خود مجھے اعتبار آئے

بہت ہی چھوٹی سی داستاں ہے ہماری صحرا نوردیوں کی

وہاں وہاں ہم برہنہ پا تھے جہاں جہاں خار زار آئے

یہ خوش نصیبی نہیں تو کیا ہے کہ اپنی مٹی لگی ٹھکانے

وہ سر تھا جو بارِ دوش عامرؔ کسی کے قدموں پہ وار آئے