فرش کے مکینوں کو عرش کی خبر لے کر میرے مصطفی آئے میرے مصطفی آئے

دوزخی زمانے میں جنتوں کے گھر لے کر میرے مصطفی آئے میرے مصطفی آئے

جہل تھا سیاہی تھی ظلم تھا تباہی تھی ہر طرف اُداسی تھی ہر طرف اُداسی تھی

ظلمتوں کے صحراء میں نور کی ڈگر لے کر میرے مصطفی آئے میرے مصطفی آئے

کفر کی سیاست میں جبر کی ریاست میں رات گہری کالی تھی رات گہری کالی تھی

اور ایسی حالت میں جلوۂ سحر لے کر میرے مصطفی آئے میرے مصطفی آئے

رقص تھا شراروں کا مرثیہ بہاروں کا سارے لوگ پڑھتے تھے سارے لوگ پڑھتے تھے

قاتلوں کی بستی میں امن کی سپر لے کر میرے مصطفی آئے میرے مصطفی آئے

شرک کی غلامی میں دور کم نگاہی میں حق سے لوگ جلتے تھے حق سے لوگ جلتے تھے

آگ کے سمندر میں شبنمی نظر لے کر میرے مصطفی آئے میرے مصطفی آئے

معرکہ ضروری تھا یعنی حق و باطل کا فیصلہ ضروری تھا فیصلہ ضروری تھا

جنگ جب چھڑی ہے تو پھر چراغِ سر لے کر میرے مصطفی آئے میرے مصطفی آئے

خوشبوئے عقیدت کے پھول ہیں یہ لفظوں کے جو شباؔب لایا ہے جو شباؔب لایا ہے

کیوں کہ سادے لفظوں میں جادوئی اثر لے کر میرے مصطفی آئے میرے مصطفی آئے