مجھے کیا ہو خواہشِ زندگی نہ سکون ہے نہ قرار ہے

مرا سینہ مہبطِ رنج و غم مرا قلب اجڑا دیار ہے

نہ گلوں کے ہونٹوں پہ ہے ہنسی نہ رخِ چمن پہ ہے تازگی

ہے خزاں کی زد میں متاعِ گل یہ عجیب فصلِ بہار ہے

تو جلا کے خاک مجھے بنا کہ وقار عشق کا ہو عطا!

مری عاقبت تری یاد ہے مری زندگی ترا پیار ہے

مجھے تیرے جلوؤں کی ہے طلب ترے نقشِ پا کی ہے جستجو

نہ صنم کدہ سے لگاؤ ہے نہ حرم ہی وجہِ قرار ہے

مرا جسم کیا مری شان کیا مری روح کیا مری جان کیا

میں نہیں ہوں کچھ بھی ترے سوا تو ہی میرا حسنِ نگار ہے

کبھی کوثرؔ آپ بھی آئیے مرے دل پہ اشک بہائیے

مرا دل ہے مدفنِ آرزو کئی خواہشوں کا مزار ہے