جلوہ ترا اس طرح سے ناکام نہ ہوتا

ہم طور پہ ہوتے تو یہ انجام نہ ہوتا

سنتا میں کہاں واعظِ ناداں کی نصیحت

گر وعظ و نصیحت میں ترا نام نہ ہوتا

غنچے کی چٹک دل کی تہوں میں نہ اترتی

اس میں جو نہفتہ ترا پیغام نہ ہوتا

یہ رزق کی ہے کور نگاہی کی نہیں بات

دانہ بھی نہ ہوتا جو کہیں دام نہ ہوتا

کٹتا بھلا کیوں کر شبِ فرقت کا اندھیرا

پلکوں پہ چراغاں جو سرِ شام نہ ہوتا

آزادؔ نشیمن سے قفس میں جو نہ آتے

اس وقت جو حاصل ہے وہ آرام نہ ہوتا