حمدنعتغزلنظمقطعاتترانےمناجاتبزم مزاحگیتادب اطفالرباعیآزاد نظم
فہرست ردیف
منتخب کلام کی ردیف کے آخری حرف کی ترتیب پر فہرست

ہوگئے رخصت یہاں سے ہائے کیا کیا آشنا

غزل| جگن ناتھ آزاؔد انتخاب| بزم سخن

ہوگئے رخصت یہاں سے ہائے کیا کیا آشنا
اب کہاں اس شہر میں کوئی ہمارا آشنا
ائے دلِ رفتہ نشاطِ عہدِ رفتہ کو نہ ڈھونڈ
یہ نئی دنیا ہے اس میں کون کس کا آشنا
زندگی بھر کا تعلق آ گیا کس موڑ پر
آشنا برسوں کا اک پل میں ہوا ناآشنا
اب کھلا اس باغ مِیں میں سبزۂ بیگانہ تھا
میں سمجھتا تھا کہ میں ہوں اس چمن کا آشنا
ساقیٔ میخانہ! تجھ سے تشنگی کی کیا کہوں
زندگی صحرا نورد و شوق دریا آشنا
یہ نہیں ہے آشنائی یہ نہیں بیگانگی
یا تو بیگانہ ہو انساں اور ہو یا آشنا
مصرعِ صائؔب پہ ہیں میرے دل و جاں وجد میں
فرق باشد جانِ از آشنا تا آشنا
ائے وطن اب کیا کہوں صحرائے اعظم کا سفر
آتی تھی نظروں میں میری ریگِ صحرا آشنا

کٹ گئی آزاؔد کس بیگانہ پن میں زندگی
کاش ہوتا شہر میں کوئی ہمارا آشنا

پچھلا کلام | اگلا کلام

شاعر کا مزید کلام