نہ تم ملے تو پھر اسرارِ جاں ملے بھی تو کیا

یقین ملے بھی تو کیا یا گماں ملے بھی تو کیا

کسی نے بھی نہ دیا ساتھ عمر بھر کے لئے

رہِ سفر میں دو اک ہم زباں ملے بھی تو کیا

نہ کوئی شاخ تھی اپنی نہ آشیاں اپنا

چمن میں ہم کو کہیں آشیاں ملے بھی تو کیا

وہ آستاں نہ رہا قسمتِ جبیں میں تو پھر

قدم قدم پہ نئے آستاں ملے بھی تو کیا

تری نظر میں سر افراز ہو سکوں نہ اگر

تو شہرتوں کے مجھے آسماں ملے بھی تو کیا

کسی نے بھی نہ جب اپنے وطن میں پہچانا

دیارِ غیر سے مہر و نشاں ملے بھی تو کیا