اب کے ہم بچھڑے تو شايد کبھی خوابوں ميں مليں

جس طرح سوکھے ہوئے پھول کتابوں ميں مليں

ڈھونڈ اُجڑے ہوئے لوگوں ميں وفا کے موتی

يہ خزانے تجھے ممکن ہے خرابوں ميں مليں

غم دنيا بھی غمِ يار ميں شامل کر لو!

نشہ بڑھتا ہے شرابيں جو شرابوں ميں مليں

تو خدا ہے نہ مرا عشق فرشتوں جيسا

دونوں انساں ہيں تو کيوں اتنے حجابوں ميں مليں

آج ہم دار پہ کھينچے گئے جن باتوں پر

کيا عجب کل وہ زمانے کو نصابوں ميں مليں

اب نہ وہ ہیں نہ وہ تُو ہے نہ وہ ماضی ہے فرازؔ

جيسے دو شخص تمنا کے سرابوں ميں ملیں