خود سے ناخوش غیر سے بیزار ہونا تھا ، ہوئے

ہم کو گردِ کوچہ و بازار ہونا تھا ، ہوئے

جن کی ساری زندگی دربار داری میں کٹی

ان کو رسوا بر سرِ دربار ہونا تھا ، ہوئے

ہم میں کچھ رندان خوش اوقات ایسے تھے جنہیں

جانشینِ جبہ و دستار ہونا تھا ، ہوئے

ہم کبھی شمشیر جوہر دار تھے لیکن ہمیں

دستِ ناہنجار میں تلوار ہونا تھا ، ہوئے

اپنا گھر جی کھول کر تاراج کرنا تھا کیا

اپنے ہاتھوں خود ہمیں مسمار ہونا تھا ، ہوئے

جن کو ساری زندگی زعمِ مسیحائی رہا

ان کو آخر ایک دن بیمار ہونا تھا ، ہوئے

تم سرِ ساحل ڈبو بیٹھے ہو محسنؔ کشتیاں

جن سفینوں کو سمندر پار ہونا تھا ، ہوئے