آئے ہیں کس ادا سے دو پٹّہ سنبھال کے

سنجیدگی سے دوش پر آنچل وہ ڈال کے

سو جان سے نثار میں روزِ وصال کے

وہ کہہ رہے ہیں دن یہ برابر ہے سال کے

آنچل ڈھلا رہا مرے مستِ شباب کا

اوڑھا گیا کبھی نہ دوپٹّہ سنبھال کے

او زلفوں والے حشر سے کچھ دل لگی نہیں

عقدے کھلیں گے آج یہاں بال بال کے

ان پیاری پیاری آنکھوں سے اک پیارکی نگاہ

میں صدقے ذبح کہ مری حسرت نکال کے

وہ کہہ رہے ہیں اشک کو میرے لہو کی بوند

آنکھوں نے رکھ دیا ہے کلیجہ نکال کے

ہو میکدے کی راہ میں گردش محال ہے

رکھا ہے ہم نے پاؤں بہت ہی سنبھال کے

کیا زہر کی بجھی ہوئی نکلی یہ موجِ اشک

پچھتائے آستین میں ہم سانپ پال کے

بیٹھے ہوئے ہیں ہاتھ دھرے ہاتھ پرریاضؔ

واعظ کے سر پر آج سبو ہم اچھال کے