پھر آپ نے دیکھا ہے محبت کی نظر سے

گزرے نہ کہیں گردشِ دوراں بھی ادھر سے

پوچھیں تو ذرا پیچ و خمِ راہ کی باتیں

کچھ لوگ ابھی لوٹ کے آئے ہیں سفر سے

شاید کہیں سورج کی کرن شام کو پھوٹے

ہم شمع جلائے ہوئے بیٹھے ہیں سحر سے

لوگو مری آشفتہ سری پر نہ کرو طنز

الزام اتارو کوئی اس زلف کے سر سے

تارے تو چمک اپنی دکھاتے ہیں سحر تک

دل ڈوبنے لگتا ہے مگر پچھلے پہر سے

غیروں کے جہاں تیری عنایت سے ہیں سیراب

ائے کاش یہ بادل مری دنیا پہ بھی برسے