حمدنعتغزلنظمقطعاتترانےمناجاتبزم مزاحگیت
فہرست ردیف
منتخب کلام کی ردیف کے آخری حرف کی ترتیب پر فہرست

کبھی ہم پر بھی وہ بت مہرباں ہو جائے نا ممکن

غزل| سحرؔ پریمی انتخاب| بزم سخن

کبھی ہم پر بھی وہ بت مہرباں ہو جائے نا ممکن
محبت بھی جہاں میں کامراں ہو جائے نا ممکن
کچھ اس ڈھب سے نظامِ گلستاں ہو جائے نا ممکن
بہار آئے کبھی دورِ خزاں ہو جائے نا ممکن
مزا جب ہے کہ ہم کو قابلِ مشقِ ستم سمجھے
مگر اتنا بھی وہ بت مہرباں ہو جائے نا ممکن
سمجھ کر دوست دشمن کو لگا لیتے ہیں سینے سے
ہمیں اپنوں پہ غیروں کا گماں ہو جائے نا ممکن
مری ہر التجا پر وہ نہیں کہہ دیتے ہیں فوراً
کبھی اک بار بھولے سے بھی ہاں ہو جائے نا ممکن
محبت کے اثر کا کس طرح مجھ کو یقیں آئے
یہاں جو دل کی حالت ہے وہاں ہو جائے نا ممکن
کچھ اس حد تک ہر اک بندے کو دعویٰ ہے خدائی کا
کہ اب بندے پہ بندے کا گماں ہو جائے نا ممکن
تجھے اے ناخدا ہرگز خدا ہم کہہ نہیں سکتے
کبھی قطرہ بھی بحر‌ِ بیکراں ہو جائے نا ممکن
مری منزل وہ منزل ہے کبھی جو مل نہیں سکتی
سرابِ دشت بھی آبِ رواں ہو جائے نا ممکن
مزا جب ہے قفس بھی آشیاں کے ساتھ جل اٹھے
کبھی یوں مہرباں برقِ تپاں ہو جائے نا ممکن
خموشی ہی بیاں کر دے تو کر دے عین ممکن ہے
زباں سے حالِ دل اپنا بیاں ہو جائے نا ممکن
کبھی بھی دل جلے کو کون روکے آہ و نالہ سے
الگ اے سحرؔ آتش سے دھواں ہو جائے نا ممکن

پچھلا کلام | اگلا کلام

شاعر کا مزید کلام