حمد نعت غزل نظم قطعات ترانے مناجات بزم مزاح گیت

فہرست ردیف

منتخب کلام کی ردیف کے آخری حرف کی ترتیب پر فہرست

آئیں گے لوٹ کر کہاں بیتے دنوں کے کارواں

غزل| نصیرؔ ترابی انتخاب| بزم سخن

آئیں گے لوٹ کر کہاں بیتے دنوں کے کارواں

گرد بھی ساتھ لے گئے ناقہ سوار و سارباں

خاک ہے کوئے دل براں خواب ہے شہرِ دوستاں

اس کے سوا ہے اور کیا اجرتِ عمرِ رائیگاں

وقت ہے کوہِ خود نگر دید و شنید بے اثر

تو ہے ادھر تو میں ادھر برف جمی ہے درمیاں

خار و خسِ ملال کیا سیلِ رم و قرار میں

چھوٹ گئے ہیں حوصلے ڈوب گئی ہیں کشتیاں

غم کی ہوا تھی پرتپاک دل کی فضا تھی تاب ناک

کیا ہیں مسافتوں کے چاک بول رہا ہے بادباں

موسمِ سبز پوش میں سارے شجر ہیں زرد زرد

جی یہی چاہتا ہے اب تجھ سے ملیں خزاں خزاں

دونوں ہوا پسند ہیں دونوں کا اعتبار کیا

آنکھیں ہیں میری رنگ برنگ چہرہ ترا دھواں دھواں

یاد نہ کر گھڑی گھڑی بھول بھی جا کبھی کبھی

چہرہ نما وہ چلمنیں چشم کشا وہ کھڑکیاں

بادِ صبا وہ آہٹیں بادِ صبا وہ دستکیں

کچھ تو جزائے ہم رہی ایسی بھی کیا اداسیاں

دل سرِ شام بجھ گئے رنگ تمام بجھ گئے

سوچ رہا ہو دیر سے جاؤں کہیں مگر کہاں

ابر شکن یہ چاندنی پرزہ قبا یہ روشنی

بکھری ہوں جیسے ہر طرف خلعتِ گل کی دھجیاں

طاق و اطاق بے چراغ خاک بسر خم و ایاغ

مسند و چتر کم فراغ یخ زدہ ترکش و کماں

تکیہ کرو مسافرو سایۂ ابر و باد پر

دیکھو زمیں کو اوڑھ کر سو بھی چکیں حویلیاں

کل بھی رہیں گی فرصتیں کل پہ رکھو مسافتیں

آؤ نصیرؔ گھر چلیں رات ڈھلی کشاں کشاں

پچھلا کلام | اگلا کلام

شاعر کا مزید کلام

آئیں گے لوٹ کر کہاں بیتے دنوں کے کارواں

زندگی خاک نہ تھی خاک اڑا کے گزری

وہ ہم سفر تھا مگر اس سے ہم نوائی نہ تھی

صبا کا نرم سا جھونکا بھی تازیانہ ہوا

وہ بے وفا ہے تو کیا مت کہو برا اس کو