اسی ٹھنڈ میں نکل کے اگر آ سکو تو آؤ

مری جان! ہلکے ہلکے اگر آ سکو تو آؤ

نئے سینڈل بدل کر اگر آ سکو تو آؤ

ذرا اوڑھ کے سنبھل کے اگر آ سکو تو آؤ

تمہیں کچھ بخار بھی ہے تمہیں کچھ زکام بھی ہے

کوئی ٹیبلٹ نگل کے اگر آ سکو تو آؤ

وہ جو برف کو گھلا دے جو سڑک کو جگمگا دے

وہ نمک بدن پہ مل کے اگر آ سکو تو آؤ

کوئی بس تمہارے گھر سے مرے گھر نہ آئے گی اب

میرے آنسوؤں میں ڈھل کے اگر آ سکو تو آؤ

یہاں سست گام چلنا ہے بہت ہی جان لیوا

مری جان اچھل اچھل کے اگر آ سکو تو آؤ

سر راہ گیلے گیلے یہ جو برف کے ہیں ٹیلے

یہ پیام ہیں اجل کے اگر آ سکو تو آؤ

جو تھے راہ کے کھلاڑی وہ پھنسا چکے ہیں گاڑی

کوئی راستہ بدل کے اگر آ سکو تو آؤ

تمہیں گرم پانیوں کی ہےطلب بہت زیادہ

مرے گھر میں سرد نلکے اگر آ سکو تو آؤ

یہ مشاعرے میں شرکت کسی اور دن پہ رکھ لو

یہ محل نہیں غزل کے اگر آ سکو تو آؤ

مرے گھر کے راستے میں کوئی کارپٹ نہیں ہے

اسی برف پہ بھسل کے اگر آ سکو تو آؤ