درد اوروں کا مرے درد سے بڑھ کر ہے یہاں

کیسے اس رشتوں کو توڑوں کہ ستمگر ہے یہاں

دل بھی خالی ہے بہت آنکھ کی جھولی کی طرح

یوں تو کہنے کو ہر اک شخص سکندر ہے یہاں

خون کے چھنیٹوں سے اگتی ہیں سروں کی فصلیں

جانتا ہوں کہ ترے ہاتھ میں خنجر ہے یہاں

زندہ رہنا ہے تو پھر کیوں نہ خدا بن جاؤں

ہے یہ وہ شہر کہ کافر بھی پیمبر ہے یہاں

شعلہ شعلہ سا ہے احساس کا عالم ، لیکن

اس کی خوشبو سے پھواروں کا سا منظر ہے یہاں

صرف آسودگیٔ دل ہی نہیں ہے عنواںؔ

خیر سے یوں تو ہر آرام میسّر ہے یہاں