حمدنعتغزلنظمقطعاتترانےمناجاتبزم مزاحگیت
فہرست ردیف
منتخب کلام کی ردیف کے آخری حرف کی ترتیب پر فہرست

یہ بات نرالی دلِ خود دار کرے ہے

غزل| حفیظؔ میرٹھی انتخاب| بزم سخن

یہ بات نرالی دلِ خود دار کرے ہے
تڑپے ہے مگر درد سے انکار کرے ہے
دنیا کا یہ انداز سمجھ میں نہیں آتا
دیکھے ہے حقارت سے کبھی پیار کرے ہے
تسلیم اسے کوئی بھی دل سے نہیں کرتا
وہ فیصلہ جو جبر کی تلوار کرے ہے
اس دشمنِ ایماں نے کیا شیخ پہ جادو
کافر جو کہے وہی دیندار کرے ہے
اب اپنے بھی سائے کا بھروسہ نہیں یارو
نزدیک جو آئے ہے وہی وار کرے ہے
تقریر سے ممکن ہے نہ تحریر سے ممکن
وہ کام جو انسان کا کردار کرے ہے
شرماتا ہوں فنکار سمجھتے ہوئے خود کو
جب جھوٹی خوشامد کوئی فنکار کرے ہے
یہ ناچتی گاتی ہوئی اس دور کی تہذیب
کیا جانئے کس کرب کا اظہار کرے ہے
مانگے ہے حفیظؔ اور ہی کچھ شعر کا بازار
کچھ اور طلب شعر کا معیار کرے ہے

پچھلا کلام | اگلا کلام

شاعر کا مزید کلام