یا محمد(ﷺ)! آپ کی کچھ ایسی یاد آئی کہ بس

میری روحِ مضطرب نے وہ خوشی پائی کہ بس

گونج اُٹھا جب فضا میں نغمۂ صلِّ علی

رحمتوں کی ہر طرف ایسی گھٹا چھائی کہ بس

فرش پر مخلوق ساری سوچتے ہی رہ گئی

عرش پر اُن کی ہوئی ایسی پذیرائی کہ بس

دے نہ پایا منزلِ مقصود کوئی راہبر

سرورِ کونین نے وہ راہ دِکھلائی کہ بس

جاں نثارانِ نبی چمکے ستاروں کی طرح

دشمنوں نےآپ کے دیکھی وہ رسوائی کہ بس

سوئے طیبہ جا رہے تھے عاشقوں کے قافلے

دیکھ کر اُن کو طبیعت ایسے للچائی کہ بس

چلتے پھرتے بیٹھتے اٹھتے زبانوں پر درود

امّتی اس قدر ہیں آقا کے شیدائی کہ بس

نعت ہونٹوں پر نظر میں روضۂ خیر الوری

خلوتوں میں شب کی ہے وہ بزم آرائی کہ بس

دامنِ رحمت شفیع المذنبیں کا ہو نصیب

ورنہ روزِ حشر ہوگی ایسی رسوائی کہ بس

کوہِ فاراں سے چلی جس دم نسیمِ لا الہ

گلشنِ ہستی میں شاہیںؔ وہ بہار آئی کہ بس