غزلیں بھی کہیں پُرغم کتنی اس پر بھی علاجِ غم نہ ہوا

دولت تو بٹی ڈھیروں ڈھیروں لیکن یہ خزانہ کم نہ ہوا

کس شام نہ بھیگیں یہ پلکیں کس صبح یہ دامن نم نہ ہوا

بجلی بھی تڑپ کر تھمتی ہے اس دل کا تڑپنا کم نہ ہوا

عالمَ میں حسیں آئے کیا کیا لیکن یہ کبھی عالمَ نہ ہوا

جس روز سنور کر تم نکلے اُس روز کہاں ماتم نہ ہوا

کہنے کو بہاریں آئیں بہت پھولوں کا بھی کِھلنا کم نہ ہوا

اشکوں کاکوئی دامن نہ بنا زخموں کا کوئی مرہم نہ ہوا

موسم نہ تو بدلے رنگ بہت بازارِ جنوں برہم نہ ہوا

زنجیروں کی یورش بڑھتی گئی دیوانوں کا جمگھٹ کم نہ ہوا

رنگیں ہے ہمیشہ صحنِ چمن رنگین مزاجوں کے دم سے

کرتے ہیں لہو سے گل کاری پھولوں کا اگر موسم نہ ہوا

دل اپنا نہ تھا آئینہ تھا لیکن تھی عجب قسمت اُس کی

اچھا تھا تو سب منہ دیکھتے تھے ٹوٹا تو کسی کو غم نہ ہوا