حمد نعت غزل نظم قطعات ترانے مناجات بزم مزاح گیت ادب اطفال رباعی آزاد نظم

فہرست ردیف

منتخب کلام کی ردیف کے آخری حرف کی ترتیب پر فہرست

زیر و بم سے ساز خلقت کے جہاں بنتا گیا

غزل| فراؔق گورکھپوری انتخاب| بزم سخن

زیر و بم سے ساز خلقت کے جہاں بنتا گیا

یہ زمیں بنتی گئی یہ آسماں بنتا گیا

داستانِ جور بے حد خون سے لکھتا رہا

قطرہ قطرہ اشکِ غم کا بے کراں بنتا گیا

عشقِ تنہا سے ہوئیں آباد کتنی منزلیں

اک مسافر کارواں در کارواں بنتا گیا

میں ترے جس غم کو اپنا جانتا تھا وہ بھی تو

زیبِ عنوانِ حدیثِ دیگراں بنتا گیا

بات نکلے بات سے جیسے وہ تھا تیرا بیاں

نام تیرا داستاں در داستاں بنتا گیا

میں کتابِ دل میں اپنا حالِ غم لکھتا رہا

ہر ورق اک بابِ تاریخِ جہاں بنتا گیا

بس اسی کی ترجمانی ہے مرے اشعار میں

جو سکوتِ راز رنگیں داستاں بنتا گیا

میں نے سونپا تھا تجھے اک کام ساری عمر میں

وہ بگڑتا ہی گیا اے دل کہاں بنتا گیا

وارداتِ دل کو دل ہی میں جگہ دیتے رہے

ہر حسابِ غم حسابِ دوستاں بنتا گیا

میری گھٹی میں پڑی تھی ہوکے حل اردو زباں

جو بھی میں کہتا گیا حسنِ بیاں بنتا گیا

سر زمینِ ہند پر اقوامِ عالم کے فراقؔ

قافلے بستے گئے ہندوستاں بنتا گیا

پچھلا کلام | اگلا کلام

شاعر کا مزید کلام

حجابوں میں بھی تو نمایاں نمایاں

کسی کا یوں تو ہوا کون عمر بھر پھر بھی

بہت پہلے سے ان قدموں کی آہٹ جان لیتے ہیں

چھیڑ اے دل یہ کسی شوخ کے رخساروں سے

ہجر و وصال یار کا پردہ اٹھا دیا